Ottawa -> Corbeil -> Hilton Beach -> Schreiber -> Dryden

So z Ottawa isch sogar no chli d poscht abgange. womr chli d stadt si go aluege heisi bim parlamänt gad so e "uffüehrig" gha mit musig u de wachmänner (die wosech nid dörfe bewege mite grosse schwarze hüet u rote jagge). Z parlamänt u ou süsch d geböude z ottawa si sehr schön, het rächt viu auti gebäude. am sunnti obe ischs de mite herre wo im gliche hostel si gsi wi mir ab ines pub, hei gfunge müesse scho widrmau i usgang, isch scho widr es zytli här gsi sit em letschte mau! heis de gad is richtige pub breicht mit super live band. eigendlech heimr nume eis wöue ga näh, si schlussändlech de glich ersch öpe am 3 zrügg im hostel gsi u hei de am nöchscht morge am 11i müesse uschecke....
abr het wunderbar klappet. irgendwie si grossstedt eifach nid so üsi fründe, hei widrmau e momänt gha bismr us derä cheibe stadt gfunge hei (het abr ou eifach zweni wägwiser!!) churz bevor mr bim nöchschte camping si acho hani doch tatsächlech widr müesse abbrämse wöu z bambi mit sim mami gad vor üsem outo über dstrass isch!! jaja so züg passiert eifach ging wenn ig fahre, ha e haube schock gha! Bim camping acho simr de gad emau i pool ghüpft, isch nämlech ändlech widrmau sehr schöns wätter gsi! ou dört hets gwimmlet vo tier, eichhörndli, hase usw....
När ischs witer bis nach Hilton Beach womr üs entschide hei 2 nächt zblibe wöus so warm gsi isch u dr campground gad am wasser gsi isch!! hei gfunge mir müess mau chli brun wärde (naja het nüt gnützt z schöne wätter, abr probiere chames ja...)
Womr de si ga tanke heimr dür zuefau usegfunge dasmr tatsächlech es ersatzrad hei!!
womr übernes högerli si hets plötzlech klepft u mir hei gmeint üses outo ghei usenang! womr de usgstige si heimr gseh dasmr vor ungerem outo e reife hei u wägem högerli het d hauterig irgendwie losgla... isch jetz ou widr gflickt:) u sit den heimr tatsächlech keni problem meh gha mitem bobby (houz alänge...)
ja u di letschte paar täg heimrs tatsächlech gschafft am 9i ufzstah u de am 10ni loszfahre dasmr mau chli vorwärts chöme :)
ja di letschte täg isch eigendlech nid dr huufe passiert wöumr würklech nume am fahre si bis zum nöchscht camping u am nöchschte tag geits glich witer! i ca. 2 täg simr de z saskatoon womr widr es paar täg blibe. mini lehrere vo vancouver isch äbe dört ufgwachse u het üs es paar tips gä! de gits de vilech widr z einte oder z angere z brichte! häbets guet u bis gli