Vancouver -> Victoria -> Whistler -> Jasper -> Banff

Jawohl das isch üsi route gsi bis jetz! Nachdäm mr no öpe e wuche z vancouver gsi si simr när ab mitr fähre nach Victoria! dört acho simr chli ga d stadt aluege u am nöchschte tag ga whale watching mache! isch eifach suuper gsi! hei ungfähr 6 wale gseh, dr eint isch richtig ufgumpet abr natürlech simr z spät gsi mit fötele :( isch rächt schwirig gsi es guets föteli z mache, da si immer nume churz si ufe cho u när widr ungerem wasser vrschwunde si...
am nöchscht tag isches när ab richtig whistler! isch e rächt länge wäg gsi drum heimr am erscht obe nüm würklech viu ungernoh! am nöchschte tag simr mitr gondle dr bärg uf, z oberscht hets sogar no e chli schnee gha u d ussicht isch eifach super gsi! ufem wäg abe mitem gondeli si diräkt unger üs 2 bäre am spile gsi u chli witer wäg isch e bäremuetter mit 2 chline ungerwägs gsi :) im summer isch whistler DAS bikerparadies! isch riiisig!
ufem camping heimr de när 3 bündner kenneglert, di hei üs de am nöchscht morge zum zmorge iglade, da si e camper mit chüeuschrank hei u mir ja äbe nid...
när simr de losgfahre richtig kamloops, dört simr nume e nacht blibe wöus chli z wit wär gsi diräkt uf jasper! dr wäg vo kamloops richtig jasper isch eifach mega schön gsi, di landschaft hie z canada isch eifach ungloublech!! u ufde föteli chunts haut eifach nüm so übere wi wemes gad gseht!
z jasper simr de ga ice age 3 luege bevor mr z füürwärk si ga luege (canada het am 1. juli äbe nationaufiirtag) nachem füürwärk isch auerdings nüm dr huufe gloffe drum simr de zrügg zu üsem campground, wo übrigens mitst im waud isch und me drum immer z ässe u so muess vrsorge wöu süsch bäre chöme.
Ja und aus nöchschts ischs när ab richtig banff, womr no bis morn si. ufem wäg dahäre heimr sooo viu tier gseh! widr e bär wo gad hinger üsem outo gmüetlech über d strass spaziert isch, geisse, ärdmännchen, es reh und gloub no chli meh :)
ja und hie z banff isch gloub z haube global village (mini schueu z vancouver), ha öpe scho 6 lüt vo dört gseh u mite einte düemr hüt obe gad grilliere!
morn geits de witer richtig calgary, dört isch de z stampede festival, so chli es cowboy festival, isch schins riisig! u dört si de gloub no meh lüt woni vo vancouver kene...
jaja hie isch eifach scho immer öpis los! :)
u üses outo louft nach es paar afangsschwirigkeite und 2 garage bsüech ou wunderbar! :D
bis gliii grüessli