Toronto -> Montreal, Zwüschehaut Kingston

Nach es paar täg z toronto, 2 drvo widr mitem pädu womr ging widr chli gseh, heimr de witer wöue richtig montreal. das hetsech abr de schwiriger usegseut aus mr dänkt hei. nachdäm mr no chinatown si ga aluege simr zum bobby id töifgarage u womr ne hei wöue alo isch doch tatsächlech d batterie dunge gsi... die vor garage hei de wöue überbrügge abr wöu vor üs e angere gad z gliche problem het gha heissi zweni power i ihrem grätli gha drum hets gheisse chömet i 2 stung widr när probiere mr nomau... nach denä 2 stung heisi nomau probiert u nix isch gange! :( schlussändlech, nach öpe 4 stung isch de e abschleppwage cho überbrügge. mir si ja ganz u gar nid gnärvt gsi u hei de no mits dür toronto dörfe fahre (=seeehr viu vrchehr u ample) richtig montreal. abr neeei das het natürlech noni glängt für dä tag, plötzlech lüchtet doch tatsächlech no z öllämpli uf! drum simr de z kingston gad abem highway zunere tanksteu, dä jung herr het üs abr nid gross chöne häufe u isch mits im gspräch drvo daser si hamburger het chöne fertig ässe... z kingston hets abr natürlech ou e canadien tire (lade mit outozuebehör u service usw). simr de dört vrbi u di hei üs tatsächlech chöne häufe, iihaaa!! di erschte vom canadien tire wo öpis a üsem vw bus wei flicke! di angere heisech ging gweigeret...
nachdäm mr de dört ou es paar stündli vrbrocht hei, heimr gfunge dasmr doch gad dört nöime e camping sueche! dr chris, arbeiter dört, het sogar no uf sini zyt üse radio gflickt! sehr nätt... mit däm simr de am obe ou no gad eis, zwöi ga trinke! ändlech mau richtigi kanadier kenneglert, wunderbar! :)
und ja när ischs witer richtig montreal, womrjetz üsi erschti nacht vrbringe. abr mir hei feschtgsteut dasmr grossstädt hasse zum outofahre, isch soo müehsam! isch ging ersch rächt spät agschribe wenn me abe highway muess, het mega vrcher u bim outofahre si d kanadier nid würklech fründlech... überhole vo aune site wos müglech isch!
morn geits de ab downtown ines hostel u de gsehmr äuä de widrmau dr pädu, isch ja scho soo lang här ;)
ah und ja es isch würklech so z kanada französisch vrsteit me würklech chum! dönt aso ganz angers aus üses, probiere üs drum da mit änglisch dürezschlah! isch irgendwie sowiso nid so eifach vom änglisch is französisch umzdänke!
ja auso di nöchschti wuche vrbringe mr da umenang wöumr ja de am 1. u 2. ouguscht hie z montreal anes musig festival gö! :)
grüessli